எழுதுகோலில் எளிமையை ஊற்றி எழுதும் கவிஞன்.

“மிகவும் எளிமையாக நீங்கள் கவிதை எழுதுவது, கவிதையுலகில் நீங்கள் வெற்றி பெற செய்யும் தந்திரமா?”

என்று கவிஞர் மு.மேத்தாவிடம் பத்திரிக்கையாளர் ஒரு நேர்காணலில் கேட்டபோது,

கவிஞர் சொன்னார்: தந்திரம் அன்று.

சுதந்திரம். நான் எளிமையானவன். என் கவிதைகளும் எளிமையானவை.

இவ்வளவு எளிமையாக இருக்கிறாரே ? என்று என்னை பார்த்து வியந்தவர்கள் தான் உண்டு.

இவ்வளவு கர்வமாக இருக்கிறாரே என்று கோபம் அடைந்தவர்கள் யாரும் இல்லை.

பொதுவாக கவிதையை வகை பிரிக்கும் திறன் ஆய்வாளர்கள் இந்த மாதிரி , முதல் வாசிப்பிலேயே புரிகின்ற கவிதைகளை வெள்ளை கவிதைகள் (white poetries) என்று கூறுவார்கள்.

அப்படி மிக மிக எளிமையாக அமைந்த மேத்தாவின் கவிதைகள் சிலவற்றின் நடை அழகையும், அர்த்த செறிவையும், கற்பனை திறத்தையும் என்னால் முடிந்த வரை இந்த சிறு கட்டுரையில், உங்களுடன் பகிர்ந்து கொள்ள முயற்சி செய்கிறேன்.

சோவியத் யூனியன் சிதறிய போது, தன் இதயமும் சிதறியதாக தன் கவிதையில் பதிவு செய்யும் மேத்தா அந்த மன அதிர்வை பதிவு செய்ய கற்பனை குதிரையில் ஏறி எங்கெங்கோ செல்லாமல்

மிக இயல்பாக,

சட்டையில் அழுக்கிருந்தால் வெளுத்து பார்க்கலாம் கொளுத்தி பார்க்கலாமா?

               (கனவு குதிரைகள் கவிதை தொகுப்பில் இருந்து )

என்கிறார் .

இந்த கவிதையை போன்றே இணையான கருத்துடைய,

மேத்தாவின் கைவண்ணத்தில் உருவான ,

“சட்ட கிழிஞ்சிருந்தா தச்சு முடிச்சிடலாம்

நெஞ்சு கிழிஞ்சிருச்சே எங்க முறையிடலாம்.”

என்ற "வேலைக்காரன் " திரைப்பாடல் வரிகள் ஏற்கனேவே பிரபலம்.

சோவியத் யூனியன்

லெனின் காலத்தில் பதிவு செய்யப்பட்ட அஞ்சல் உறை

ஸ்டாலின் காலத்தில் உள்நாட்டு அஞ்சல் உறை

கோர்பச்சேவ் காலத்திலோ வெறும் அஞ்சல் அட்டை

               (கனவு குதிரைகள் கவிதை தொகுப்பில் இருந்து )

என்று சோவியத் யூனியனின் வெவ்வேறு காலங்களை

உருவக படுத்தும் மேத்தா அரசியல் துறையுடன் அஞ்சல்துறையை ஒரு சிறு முடிச்சு போடுவதன் மூலம் மிக எளிமையாக தன் கருத்தை வாசகர்கள் மனதில் பதிவு செய்கிறார்.

ஒருவர் என்னதான் கவிதை உலகில் சாதனை செய்தாலும் அவரை இந்த ஊடகங்கள் கண்டு கொள்வதில்லை.

ஒருவர் திரைப்பட பாடல் எழுதி வெற்றி பெற்று விட்டால், அவருடைய

கவிதைகளை தலையில் தூக்கி வைத்து கொண்டாடுகின்றன.

பெரும்பாலும் இவ்வாறே. விதி விலக்குகள் இருக்கலாம்.

கவிஞர் மேத்தாவே இந்த விசயத்தில் விதி விலக்காகவே இருக்கிறார்.

கவிஞர் மேத்தா திரைப்பட பாடல் துறைக்கு வரும் முன்னரே, "கண்ணீர்ப்பூக்கள்" மற்றும் "ஊர்வலம் " போன்ற கவிதை தொகுப்புகளின் மூலம் ஒரு நாடறிந்த கவிஞனாக உருவாகி இருந்தார்.

மற்றொரு எடுத்துக்காட்டு தமிழ் இசை கலைஞர் புஷ்பவனம் குப்புசாமி ஆவார்.

இவர் தமிழகத்தின் பட்டி தொட்டி எங்கும் ஒரு நாட்டுபுற இசைப்பாடல் கலைஞராக அறியப்பட்ட பின்பு திரை துறையிலும் நுழைந்து பின்னணி பாடகராக தன பங்களிப்பை செய்துகொண்டிருக்கிறார்.

மேத்தா, புஷ்பவனம் குப்புசாமி போன்ற ஆற்றல் மிக்க கலைஞர்களை திரைத்துறையின் புகழ் வெளிச்சம் பாதிக்க முடியவில்லை.

அதே நேரத்தில் ,ஏனையோர் நிலை அவ்வாறில்லை.

ஒருவர் என்னதான் திறமையை வெளிப்படுத்தினாலும் திரைத்துறையின் அறிமுகம் இல்லாத காரணத்தினாலேயே இந்த மக்களாலும், ஊடகங்களாலும் அடையளாம் காணப்படாமல் போகிற அவலநிலை ஏற்பட்டு விடுகிறது.

இதை படகு காரன் பாட்டு என்ற தன் கவிதையில் சொல்ல வந்த கவிஞர் ,

“கப்பலில் வந்த கனதவான்கள்

கைகள் பிசய

இயந்திர படகுகளில் வந்தோரின்

இதயங்கள் கசிய ”

              (“கனவு குதிரைகள்” கவிதை தொகுப்பில் இருந்து )

என்ற வரிகளில் ,

கப்பலை அரசியல் இயக்கங்களுக்கும் , இயந்திர படகை  திரை துறைக்கும் குறியீடாக மிக பொருத்தமாக கையாண்டிருக்கிறார்.

அரசியல் கட்சித்தலைவர்கள் , ஒவ்வொரு நாளும் ஒவ்வொரு விதமாக இடத்திற்கு தகுந்த படி பேசி எந்த வளமும் குன்றாமல் வாழ்கிறார்கள்.

ஆனால் தொண்டர்கள்தான் ஒரு அரசியல் கட்சிக்காக தினம் தினம் உழைத்து

பலன் ஏதும் இல்லாமல் மாண்டு போகிறார்கள்.

இந்த அவலத்தை சுட்ட வந்த கவிஞர்,

இந்த தேசத்தில் தலைவர்கள் எல்லாம்

கடிகாரங்கள் மாதிரி

இடத்திற்கு தகுந்தாற்போல்

நேரம் காட்டுகிறார்கள்.

தொண்டர்கள்தான் பாவம்

கிழக்கு வெளுத்த உடன்

கிழித்தெறியப்படுகிறார்கள்.

                       (“கனவு குதிரைகள்” கவிதை தொகுப்பில் இருந்து )

என்கிறார்.

இந்த கவிதையில் , ஒவ்வொரு நாட்டிலும் கடிகாரங்கள் காட்டும் நேரம் வேறுபடுவதும் , ஒரு நாள் முடிந்தவுடன் நாள்காட்டி தாள்கள் கிழித்தெறிய படுவதையும்  தான் சொல்ல வந்த செய்தியோடு மிக அழகாகவும், எளிமையாகவும் பொருத்திவிடுகிறார்.

“சிறகே சுமைதான்” என்று தன கவிதைக்கு தலைப்பிடுவதன் மூலம்,ஒரு பெண் பருவம் அடைவதே அவளுக்கு மிக பெரிய அடிமைத்தனத்தை சுமத்துவதற்கான ஆரம்பமாக மாறி விடுவதை மிக துல்லியமாக சொல்லிவிடுகிறார்.

                    ("அவர்கள் வருகிறார்கள்" கவிதை தொகுப்பில் இருந்து )

கவிஞர் கண்ணதாசன் காலமான போது கவிஞர் மு.மேத்தா எழுதிய இரங்கல் கவிதையில்,

வானவர் தேசத்து வண்ணப்படத்திற்கு

பாடல்கள் புனைந்திட எங்கள் பாவலன் சென்றான்.

அது சரி !

எமன் எப்பொழுது இசையமைப்பாளர் ஆனான்?

                     ("காத்திருந்த காற்று" கவிதை தொகுப்பில் இருந்து )

என்று வினா தொடுத்திருப்பார்.

திரைப்பட பாடல் எழுத ஒரு பாடல் ஆசிரியரை அழைப்பவர் இசை அமைப்பாளரே என்ற நடைமுறை உண்மையை வைத்துக்கொண்டு, மேல் உலகம் சென்றும் கூட கண்ணதாசனின் எழுத்துப்பணி தொடர்வதாக கற்பனை செய்யும் மேத்தாவின் கவிதை ஆற்றல் நம்மை வியப்பில் ஆழ்த்துகிறது.

எளிமையும் வெறுமையும்

 

மரபுக்கவிதையின் சில வேலிகளை தகர்த்துதான்  நாங்கள் புதுக்கவிதையை கொண்டு வர முடிந்தது.

என் மீது கூட ஒரு குற்றசாட்டை கூறுவார்கள் :

"மு.மேத்தா புதுக்கவிதையை எளிமை படுத்தியது மட்டுமல்லாமல் ,வெறுமைப்படுத்தியும் விட்டார் " என்று.

• மேற்கண்ட கருத்துக்கள் இணைய தள(tamilonline) நேர்காணல் ஒன்றில் ,

கவிஞர் மு.மேத்தா அவர்கள் குறிப்பிட்டவை .

கவிஞர் மு .மேத்தா வை பற்றி இப்படி குறிப்பிட்டவர் கவிஞர் நா.காமராசன்

.ஆனால் இந்த வார்த்தைகளில், இந்த பொருளில் அவர் குறிப்பிடவில்லை .

"என் நண்பர் மேத்தா புதுக்கவிதையை எளிமை ஆக்கினார்

ஆனால் இவர்களோ வெறுமை ஆக்கிவிட்டார்கள். "

என்றே கூறினார் .

 இரண்டிற்கும் மலையளவு வேறுபாடு உண்டு என்பது மிக எளிதில் விளங்கும் . நா.காமராசனின் இந்த புதுக்கவிதையின் அன்றைய (எண்பதுகளின்) போக்கு குறித்த மதிப்பீட்டையும் மு .மேத்தாவின் நூல்கள் (திறந்த புத்தகம், இதய வாசல்) வாயிலாகவே நான் அறிந்தேன் .

 

காலத்தின் ஓட்டத்தில்  கவிஞர் மு.மேத்தா மறதியின் காரணமாக  அந்த வார்த்தைகளை மாற்றி கூறி இருக்க வேண்டும் . அல்லது அந்த இணையத்தள நண்பர்கள் கவனக்குறைவாக வேறு பொருள் வரும்படி தட்டச்சு செய்திருக்க வேண்டும் .

எனவே , கவிஞர் நா.காமராசன் , கவிஞர் .மு மேத்தா வை குற்றம் சாட்ட வில்லை .

புதுக்கவிதையை மேத்தா எளிமைப்படுத்தியதை குறை காணவில்லை .

 ஆனால் ஒரு சிலர் ஆர்வமிகுதியில் அதை வெறுமை ஆக்கி விட்டார்களே என்பதே நா .காமராசனின் ஆதங்கம் .

புதுக்கவிதை என்கின்ற இலக்கிய வடிவத்தை ஒரு கலை வடிவம் என்கிற சிறு கூட்டுக்குள் இருந்து அறிவாயுதமாக , சமூகத்தின் போர் கருவியாக சிறகடிக்க செய்ததில் மு.மேத்தாவின் பங்கு முக்கியமானது;.முதன்மையானது.

புரட்சி கவிஞர் பாரதி தாசனால் பொங்கி பிரவாகம் எடுத்த தமிழ் தேசீய சிந்தனைகளையும் உள்ளடக்கி , பாரதியின் உலகளாய்ந்த பார்வையையும் உள்விழுங்கி கொண்டு, மார்க்சீய தளத்தில் கால் பதித்து நின்றதே வானம்பாடிகளின் தனிச்சிறப்பு .

அத்தகைய வானம்பாடிகள் இயக்கத்தின் கவிஞர்களில் ஒருவரான மு .மேத்தா  கவிதையை,எளிமைப்படுத்தியதன் மூலமே மக்கள் மயமாக்கினார் .

 

எளிமையே கவிஞர் .மு.மேத்தாவின் வலிமை.

கவிதை உலகில் மு.மேத்தாவின் மகத்தான  வெற்றியின் ரகசியம்தான் என்ன?

கவிஞர் .பாலா குறிப்பிட்டதை போல ,

எந்த இலக்கண புலவனுக்கும் வேலை வைக்காத எளிமைதான்.

படைப்பாளியின் மதம்

என் பள்ளி நாட்களில் ஒரு நாள் வானொலியில் கவிஞர் மு.மேத்தா எழுதிய "காலம் பொறந்திடுச்சு சின்ன மயிலே" என

தொடங்கும் பாடல் ஒலித்து கொண்டிருந்தது.

அந்த பாடலில்,  அஞ்சுகின்ற முகத்தை  காண்பதற்கு ஆறுமுகம் கூட  வருவதில்லை

நெஞ்சமெனும் அடுப்பில் நெருப்பிருக்கு

வஞ்சகரின் உலகில் பயமெதற்கு?

என்ற வரிகளை கேட்ட என் தந்தை ,

அவரு (கவிஞர் மு.மேத்தா) பாய் அதான் இப்படி எழுதி இருக்காரு என்று  சிரித்துகொண்டே கூறினார்.

கவிஞரின் பாடல் வரிகளுக்கு மத சாயம் பூசிய வார்த்தைகளை கேட்டவுடனேயே

நான் கவிஞர் .சிற்பியின் கவிதை ஒன்றை குறிபிட்டு என் தந்தைக்கு சட்டென்று  பதில் தந்தேன்

கவிஞர் சிற்பி தன் கவிதை ஒன்றில் இராணுவத்தினரால் பாலியல்

வல்லுறவிற்கு ஆளான பெண்ணின் வேதனையின் உச்சத்தை பதிவு செய்வதற்கு,

"அருளாளனும் அன்பாளனுமாகிய அல்லா தலை குனிந்து கொண்டான்" என்று எழுதினார்

இங்கே கவிஞர் சிற்பி பாதிக்கப்பட்ட பெண்ணின் வேதனையை

அல்லாவால் தாங்கமுடியவில்லை என்ற பொருள் படவே  அவ்வாறு

தன் கவிதையில் எழுதியுள்ளார்.

அதைப்போலவே கவிஞர் மு.மேத்தாவும் அச்சம் கொள்ள கூடாது.

துணிந்து போராடினாலே தெய்வம் துணை நிற்கும்.

என்ற கருத்தை பதிவு செய்வதற்கே அவ்வாறு எழுதியுள்ளார்.

இதில் மேத்தாவை இஸ்மாயிலர் என்றோ சிற்பியை ஹிந்து  என்றோ

அடையாள படுத்துவது அபத்தத்திலும் அபத்தம்.

மதமேதும் இல்லாமல் இருப்பதே படைப்பாளியின் மதம்.

வெண்ணிலவின் கண்ணீர்

வெண்ணிலவின் கண்ணீர் என்ற தலைபிட்ட கவிக்கோ. அப்துல் ரகுமானின் கவிதையை வாசித்தபோது எனக்கு சில சிந்தனைகள் உதித்தது.அவற்றை பகிர்ந்துகொள்ளவே இந்த சிறு பதிவு.

என் அணைப்பை விட்டே
இனி சிறிது என் செல்வத்தை
உன் அணைப்பில் ஏந்தென்று
உறக்கத்தைத் தாய்ழைக்கும்
தாலாட்டு பாட்டினிலே

என்ற அந்த கவிதையில்,கவிஞர் அன்னையின் அரவணைப்பிற்கு
ஈடாக கூறியுள்ள உறக்கத்தை தாண்டியும் நம் சிந்தனை விரிகிறது.

அன்னையின் அரவணைப்பிற்கு ஈடாக உறக்கம் மட்டும்தான் இருக்க வேண்டுமா?

தாலாட்டு பாடல் இருக்க கூடாதா?
என்ற சிந்தனை கவிதையை வேறு விதமாகவும் அமைக்க நம்மை தூண்டுகிறது.

வானத்திலே திருவிழா

ஒவ்வொரு மனிதனும் தன் குழந்தை பருவத்தை
மறந்து விடமுடியாது

கவலைகள் ஏதுமின்றி வானம்பாடிகளை போலே
நாம் பறந்து திரிந்த காலங்கள் அவை.

வயதுகள் ஏற ஏற பொறுப்புகளும்,பொருளாதார
சுமைகளும் நம்மை அழுத்துகின்றன.

மீண்டும் அந்த ஆரம்பபள்ளி நாட்களுக்கு ...

நாம் ஊஞ்சல் ஆடிய பழைய தொட்டிலுக்கு ...

ஒரு மீள் பயணம்.

அங்கே நம் மனகுகை ஓவியங்களில்தான்

எத்தனை எத்தனை வண்ண வண்ண

ஓவியங்கள்

கால கரையான் அரிககாமலும்,எண்ண தூசிகள்
படியாமலும் ஒரு சிலரால்தான் அந்த ஓவியங்களை

பாதுகாக்க முடிகிறது.


அந்த வகையிலே இந்த குழந்தை இலக்கிய கவிதை

என் ஆரம்பபள்ளி நாட்களில் நான் தமிழ் பாட

நூலில் படித்தது.

சுவைத்தது.

இந்த கவிதையை எழுதியவர் கவிஞர் பொன்.செல்வ கணபதி.


கவிஞர் மு.மேத்தா உடன் பணியாற்றிய பேராசிரிய
நண்பர்.


சென்னை தலை நகரம்
மட்டும் அல்ல

சிலை நகரமும் கூட

இங்கேதான் தலைவர்கள்

சிலைகளில் கூட பேசிக்கொண்டு இருக்கிறார்கள்


உழைப்பாளிகள்

உழைத்து கொண்டு இருக்கிறார்கள்

என்ற அற்புதமான கவிதை வரிகளை படைத்த
முற்போக்கு கவிஞர்.

அந்த கவிதை இதோ...

வானத்திலே திருவிழா

வழக்கமான ஒருவிழா

இடிஇடிக்கும் மேளங்கள்

இறங்கி வரும் தாளங்கள்


மின்னல் ஒரு நாட்டியம்

மேடை வான மண்டபம்

தூறல் ஒரு தோரணம்

துய மழை காரணம்


எட்டு திசை காற்றிலே

ஏக வெள்ளம் ஆற்றிலே

தெருவெல்லாம் வெள்ளமே

திண்ணை ஓரம் செல்லுமே


தவளை பாட்டு பாடுமே

தண்ணீரிலே ஆடுமே

படைபாளிகள் இயக்கம் சார்ந்து இயங்கலாமா?

படைபாளிகள் இயக்கம் சார்ந்து இயங்கலாமா?
என்ற விவாதம் நிகழ்ந்து கொண்டே வருகிறது.
இது குறித்து என் பார்வையை பதிவு செய்வதே
இந்த சிறு கட்டுரையின் நோக்கம்.


படைபாளிகள் தனித்தே இயங்க வேண்டும் என்பது
எழுத்தாளர் சுந்தர ராமசாமியின் கருத்து.


சுந்தர ராமசாமியின் மேற்கண்ட கருத்தை மறுக்கும்
ச.தமிழ்செல்வன் எந்த இயக்கத்தை
சாராமல் ஒரு படைப்பாளி இயங்கினாலும்
நகராட்சி , மாநகராட்சி போன்ற அரசமைப்பின்
கீழ் தானே வாழ்ந்து ஆக வேண்டும் என்கிறார்.


கவிஞர் மு.மேத்தா ஒரு நேர்காணலில்

ஒரு கவிஞன் ஒரு சமூக இயக்கத்தோடு தன்னை
ஒட்டி வைத்து கொள்ளலாம்.ஆனால் கட்டி வைத்து
கொள்ள கூடாது

என்கிறார்.

கவிஞரின் கருத்தும் ஏறக்குறைய சுந்தர ராமசாமியின்
கருத்தையே ஒத்து இருக்கிறது.


ஒரு படைப்பாளி குறிப்பிட இயக்கத்தின் கருத்துக்களால்
கவரப்பட்டு தன் படைப்புகளில் அவற்றை
பிரதி பலிப்பதோ மேற்கோள் காட்டுவதோ
தவறில்லை.

ஆனால் ஒரு இயக்கத்தின் முழுநேர பணியாளராக
மாறினால் தனித்தன்மையை இழக்க நேரிடும்.

ஒருவேளை விதிவிலக்காக ஒரு இயக்கத்தின்
முக்கிய பொறுப்பில் இருக்கும் போதே சுயமான
கருத்தையும் பேணி வரும் உரிமை இருக்குமானால்


அப்படி பணியாற்றுவதில் சிக்கலில்லை.

இந்த கூற்றுக்கு நடைமுறை உதாரணமாக
இருப்பவர் திரு.ரவிக்குமார் ஆவார்.

இவர் விடுதலை சிறுத்தைகள் கட்சியின் முக்கிய
பொறுப்பில் இருப்பவர்.
இவருக்கும் கட்சி தலைவர் திரு.தொல்.திருமாவளவனுக்கும்
லட்சியம் ஒன்றே
என்றாலும் சிற்சில விசயங்களில் அதை அடையும்
வழிமுறைகளில் கருத்து வேறுபாடு உண்டு.


இந்த செய்தியை ஒரு நேர்காணலில் திரு .ரவிக்குமாரே
பதிவு செய்து இருக்கிறார்.

இப்படிப்பட்ட சிந்தனை சுதந்திரம் வி.சி. கட்சியில்
இருப்பது ஒரு தலித் விடுதலை இயக்கம் என்ற
வகையில் மிக மிக பொருத்தம் உடையதே.